ਨਵੀਂ ਦਿੱਲੀ, 13 ਜੁਲਾਈ (ਦਲਜੀਤ ਸਿੰਘ)- ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਮੰਗਲਵਾਰ ਨੂੰ ਟੋਕਿਓ ਓਲੰਪਿਕ ਵਿੱਚ ਹਿੱਸਾ ਲੈਣ ਵਾਲੇ 15 ਅਥਲੀਟਾਂ ਨਾਲ ਵਿਚਾਰ ਵਟਾਂਦਰੇ ਕੀਤੇ। ਵਿਚਾਰ ਵਟਾਂਦਰੇ ਦੌਰਾਨ ਪ੍ਰਧਾਨ ਮੰਤਰੀ ਨੇ ਸਾਰੇ ਖਿਡਾਰੀਆਂ ਨੂੰ ਓਲੰਪਿਕ ਲਈ ਸ਼ੁੱਭਕਾਮਨਾਵਾਂ ਦਿੱਤੀਆਂ ਅਤੇ ਸਾਰਿਆਂ ਨੂੰ ਬਗੈਰ ਕਿਸੇ ਦਬਾਅ ਦੇ ਖੇਡਣ ਦਾ ਮੰਤਰ ਦਿੱਤਾ। ਉਨ੍ਹਾਂ ਨੇ ਕਿਹਾ, “ਪੂਰੇ ਦੇਸ਼ ਨੂੰ ਤੁਹਾਡੇ ਤੋਂ ਉਮੀਦਾਂ ਹਨ ਅਤੇ ਤੁਸੀਂ ਲੋਕ ਦੇਸ਼ ਦਾ ਨਾਂਅ ਰੋਸ਼ਨ ਕਰੋਗੇ।”
ਪੀਐਮ ਮੋਦੀ ਨੇ ਕਿਹਾ, “ਤੁਹਾਨੂੰ ਸਾਰਿਆਂ ਨੂੰ ਉਮੀਦਾਂ ਦੇ ਬੋਝ ਤੋਂ ਦਬਾਅ ਮਹਿਸੂਸ ਨਹੀਂ ਹੋਣਾ ਚਾਹੀਦਾ। ਤੁਸੀਂ ਸਾਰੇ ਆਪਣਾ 100 ਪ੍ਰਤੀਸ਼ਤ ਦੇ ਕੇ ਤਗਮਾ ਜਿੱਤਣ ਦੀ ਕੋਸ਼ਿਸ਼ ਕਰੋ। ਉਮੀਦ ਹੈ ਕਿ ਤੁਸੀਂ ਇਸ ਵਾਰ ਦੇਸ਼ ਲਈ ਮੈਡਲ ਲੈ ਕੇ ਆਓਗੇ। ਤੁਹਾਡੇ ਸਾਰਿਆਂ ਨੂੰ ਸ਼ੁੱਭਕਾਮਨਾਵਾਂ. ਸਾਰੇ ਦੇਸ਼ ਦੇ ਲੋਕਾਂ ਦੀਆਂ ਸ਼ੁੱਭਕਾਮਨਾਵਾਂ ਤੁਹਾਡੇ ਨਾਲ ਹਨ। ਤੁਸੀਂ ਸਾਰੇ ਜਾਪਾਨ ਵਿਚ ਜ਼ਬਰਦਸਤ ਖੇਡੋ।
ਆਰਚਰ ਦੀਪਿਕਾ ਕੁਮਾਰੀ ਨਾਲ ਵਿਚਾਰ ਵਟਾਂਦਰੇ ਦੌਰਾਨ ਪੀਐਮ ਮੋਦੀ ਨੇ ਕਿਹਾ, “ਮੈਂ ਤੁਹਾਡੇ ਬਚਪਨ ਦੀ ਕਹਾਣੀ ਸੁਣੀ ਕਿ ਤੁਹਾਡੀ ਤੀਰਅੰਦਾਜ਼ੀ ਦੀ ਸ਼ੁਰੂਆਤ ਅੰਬ ਤੋੜਣ ਨਾਲ ਸ਼ੁਰੂ ਹੋਈ ਸੀ। ਇਸ ‘ਤੇ ਤੁਹਾਡਾ ਕੀ ਕਹਿਣਾ ਹੈ?’
ਇਸ ਦੇ ਜਵਾਬ ਵਿਚ ਦੀਪਿਕਾ ਨੇ ਦੱਸਿਆ ਕਿ ਉਹ ਬਚਪਨ ਵਿਚ ਅੰਬ ਤੋੜਨਾ ਪਸੰਦ ਕਰਦੀ ਸੀ। ਇਸ ਤੋਂ ਇਲਾਵਾ ਉਨ੍ਹਾਂ ਪ੍ਰਵੀਨ ਕੁਮਾਰ ਜਾਧਵ, ਨੀਰਜ ਚੋਪੜਾ, ਮੈਰੀਕਾਮ, ਪੀਵੀ ਸਿੰਧੂ, ਅਸ਼ੀਸ਼ ਕੁਮਾਰ, ਸ਼ਰਦ ਕਮਲ, ਇਲਾ, ਵਿਨੇਸ਼ ਫੋਗਲ ਅਤੇ ਮਨਪ੍ਰੀਤ ਨਾਲ ਗੱਲਬਾਤ ਕੀਤੀ। ਉਨ੍ਹਾਂ ਨੇ ਸਾਰੇ ਖਿਡਾਰੀਆਂ ਨੂੰ ਕੁਝ ਸਵਾਲ ਪੁੱਛੇ ਅਤੇ ਉਨ੍ਹਾਂ ਸਾਰਿਆਂ ਨੂੰ ਓਲੰਪਿਕ ਲਈ ਸ਼ੁੱਭ ਕਾਮਨਾਵਾਂ ਦਿੱਤੀਆਂ।
ਗੱਲਬਾਤ ਦੌਰਾਨ ਪੀਐਮ ਮੋਦੀ ਨੇ ਤੀਰਅੰਦਾਜ਼ ਪ੍ਰਵੀਨ ਕੁਮਾਰ ਜਾਧਵ ਨੂੰ ਪੁੱਛਿਆ ਕਿ “ਤੁਹਾਡੀ ਸਿਖਲਾਈ ਪਹਿਲਾਂ ਅਥਲੈਟਿਕਸ ਲਈ ਸੀ, ਫਿਰ ਤੁਸੀਂ ਤੀਰਅੰਦਾਜ਼ ਕਿਵੇਂ ਬਣੇ?” ਇਸ ‘ਤੇ ਪ੍ਰਵੀਨ ਨੇ ਦੱਸਿਆ ਕਿ ਉਸ ਸਮੇਂ ਉਹ ਸਰੀਰਕ ਤੌਰ ’ਤੇ ਕਮਜ਼ੋਰ ਸੀ, ਇਸ ਕਾਰਨ ਕੋਚ ਨੇ ਤੀਰਅੰਦਾਜ਼ੀ ਲਈ ਪ੍ਰੇਰਤ ਕੀਤਾ। ਉਹ ਕੁਝ ਹਾਸਲ ਕਰਨ ਲਈ ਘਰ ਤੋਂ ਬਾਹਰ ਆਇਆ ਸੀ, ਇਸ ਲਈ ਉਸਨੇ ਤੀਰਅੰਦਾਜ਼ੀ ਵਿਚ ਆਪਣਾ ਮਨ ਬਣਾਇਆ ਅਤੇ ਅੱਜ ਉਸ ਨੇ ਇਸ ਵਿਚ ਮੁਹਾਰਤ ਹਾਸਲ ਕੀਤੀ।
ਟੋਕਿਓ ਓਲੰਪਿਕ ਖੇਡਾਂ 23 ਜੁਲਾਈ ਨੂੰ ਸ਼ੁਰੂ ਹੋਣਗੀਆਂ। ਓਲੰਪਿਕ 8 ਅਗਸਤ ਨੂੰ ਸਮਾਪਨ ਕੀਤਾ ਜਾਵੇਗਾ। ਇਸ ਵਾਰ ਟੋਕਿਓ ਓਲੰਪਿਕ ਵਿੱਚ 126 ਭਾਰਤੀ ਐਥਲੀਟ ਹਿੱਸਾ ਲੈਣਗੇ। ਭਾਰਤੀ ਅਥਲੀਟ ਦੀ ਟੀਮ 17 ਜੁਲਾਈ ਨੂੰ ਟੋਕਿਓ ਲਈ ਰਵਾਨਾ ਹੋਵੇਗੀ। ਇਸ ਸਮੇਂ ਜੋ ਐਥਲੀਟ ਵਿਦੇਸ਼ਾਂ ਵਿੱਚ ਰਹਿ ਕੇ ਤਿਆਰੀ ਕਰ ਰਹੇ ਹਨ ਉੱਥੋਂ ਸਿੱਧੇ ਟੋਕਿਓ ਪਹੁੰਚਣਗੇ।
ਓਲੰਪਿਕ ਵਿੱਚ ਹਿੱਸਾ ਲੈਣ ਜਾ ਰਹੇ 15 ਅਥਲੀਟਾਂ ਨਾਲ ਮੋਦੀ ਨੇ ਕੀਤੀ ਖਾਸ ਗੱਲਬਾਤ, ਪੁੱਛੇ ਇਹ ਸਵਾਲ
