ਧਨਬਾਦ, 23 ਨਵੰਬਰ (ਦਲਜੀਤ ਸਿੰਘ)- ਝਾਰਖੰਡ ’ਚ ਧਨਬਾਦ ਜ਼ਿਲ੍ਹੇ ਦੇ ਗੋਵਿੰਦਪੁਰ ਥਾਣਾ ਖੇਤਰ ’ਚ ਮੰਗਲਵਾਰ ਦੀ ਸਵੇਰ ਕਾਰ ’ਚ ਖੱਡ ’ਚ ਪਲਟਣ ਨਾਲ 5 ਲੋਕਾਂ ਦੀ ਮੌਤ ਹੋ ਗਈ। ਪੁਲਸ ਸੂਤਰਾਂ ਨੇ ਇੱਥੇ ਦੱਸਿਆ ਕਿ ਕਾਰ ’ਤੇ ਸਵਾਰ ਲੋਕ ਜਾ ਰਹੇ ਸਨ, ਉਦੋਂ ਜੀ.ਟੀ. ਰੋਡ ਕਾਲਾਡੀਹ ਮੋੜ ’ਤੇ ਕਾਰ ਬੇਕਾਬੂ ਹੋ ਕੇ ਪੁਲੀਆ ਹੇਠਾਂ ਖੱਡ ’ਚ ਡਿੱਗ ਗਈ।
ਮ੍ਰਿਤਕਾਂ ’ਚ 2 ਲੋਕਾਂ ਦੀ ਪਛਾਣ ਵਸੀਮ ਅਕਰਮ ਅਤੇ ਸ਼ਕੀਲ ਅਹਿਮਦ ਦੇ ਰੂਪ ’ਚ ਕੀਤੀ ਗਈ ਹੈ, ਜਦੋਂ ਕਿ ਹੋਰ ਦੀ ਪਛਾਣ ਨਹੀਂ ਕੀਤੀ ਜਾ ਸਕੀ ਹੈ। ਸ਼ਕੀਲ ਅਹਿਮਦ ਟਾਟਾ ਵੈਸਟ ਬੋਕਾਰੋ ਡਿਵੀਜ਼ਨ ਘਾਟੋ ’ਚ ਤਾਇਨਾਤ ਸੀ। ਸੂਤਰਾਂ ਨੇ ਦੱਸਿਆ ਕਿ ਘਟਨਾ ਦੀ ਜਾਣਕਾਰੀ ਮਿਲਣ ਤੋਂ ਬਾਅਦ ਮੌਕੇ ’ਤੇ ਪੁੱਜੀ ਪੁਲਸ ਨੇ ਲਾਸ਼ਾਂ ਨੂੰ ਪੋਸਟਮਾਰਟਮ ਲਈ ਸ਼ਹੀਦ ਨਿਰਮਲ ਮਹਤੋ ਮੈਡੀਕਲ ਯੂਨੀਵਰਸਿਟੀ ਹਸਪਤਾਲ (ਐੱਸ.ਐੱਨ.ਐੱਮ.ਸੀ.ਐੱਚ.) ਧਨਬਾਦ ਭੇਜ ਦਿੱਤਾ ਹੈ।
