ਜਲੰਧਰ : ਇਕ ਹਫ਼ਤੇ ‘ਚ ਤਾਪਮਾਨ ‘ਚ ਦੋ ਡਿਗਰੀ ਦੀ ਗਿਰਾਵਟ ਨਾਲ ਠੰਢ ਵਧਣੀ ਸ਼ੁਰੂ ਹੋ ਜਾਵੇਗੀ। ਐਤਵਾਰ ਦੀ ਗੱਲ ਕਰੀਏ ਤਾਂ ਘੱਟੋ-ਘੱਟ ਤਾਪਮਾਨ 12 ਡਿਗਰੀ ਤੇ ਵੱਧ ਤੋਂ ਵੱਧ ਤਾਪਮਾਨ 27 ਡਿਗਰੀ ਰਿਹਾ। 29 ਤੇ 30 ਨਵੰਬਰ ਨੂੰ ਘੱਟੋ-ਘੱਟ ਤਾਪਮਾਨ 10 ਡਿਗਰੀ ਤਕ ਪਹੁੰਚ ਜਾਵੇਗਾ। ਸੂਰਜ ਦੇ ਨਾਲ-ਨਾਲ ਬੱਦਲ ਵੀ ਛਾਏ ਰਹਿਣਗੇ। ਮੌਸਮ ਵਿਭਾਗ ਦੀ ਭਵਿੱਖਬਾਣੀ ਮੁਤਾਬਕ ਮੀਂਹ ਦੀ ਕੋਈ ਸੰਭਾਵਨਾ ਨਹੀਂ ਹੈ। ਸ਼ਹਿਰ ਦੀ AQI ਸਥਿਤੀ ਵਿੱਚ ਕੁਝ ਸੁਧਾਰ ਹੋਇਆ ਹੈ ਪਰ ਸੰਤੋਸ਼ਜਨਕ ਨਹੀਂ ਹੈ।
ਹਵਾ ‘ਚ ਘੁਲੇ ਜ਼ਹਿਰੀਲੇ ਕਣ ਸ਼ਹਿਰ ਵਾਸੀਆਂ ਲਈ ਖ਼ਤਰਨਾਕ ਸਾਬਿਤ ਹੋ ਰਹੇ ਹਨ। ਲੋਕ ਠੰਢ ਦੇ ਨਾਲ-ਨਾਲ ਐਲਰਜੀ ਦਾ ਵੀ ਸ਼ਿਕਾਰ ਹੋ ਰਹੇ ਹਨ। ਨੱਕ ਦੀ ਐਲਰਜੀ ਦੇ ਮਰੀਜ਼ ਸਰਕਾਰੀ ਤੇ ਪ੍ਰਾਈਵੇਟ ਹਸਪਤਾਲਾਂ ਦੀ ਓਪੀਡੀ ‘ਚ ਪਹੁੰਚ ਰਹੇ ਹਨ। ਐਲਰਜੀ ਘੱਟੋ-ਘੱਟ ਪੰਜ ਦਿਨਾਂ ਤਕ ਰਹਿ ਰਹੀ ਹੈ।
257 ਸੀ AQI
ਸਿਹਤ ਵਿਭਾਗ ਨੇ ਘਰੋਂ ਬਾਹਰ ਨਿਕਲਣ ਤੋਂ ਪਹਿਲਾਂ ਮਾਸਕ ਪਹਿਨਣ ਲਈ ਕਿਹਾ ਹੈ। ਜ਼ਹਿਰੀਲੀਆਂ ਗੈਸਾਂ ਹਵਾ ‘ਚ ਘੁਲ ਗਈਆਂ ਹਨ ਤੇ ਲੋਕਾਂ ਦੇ ਸਾਹ ਰਾਹੀਂ ਸਰੀਰ ‘ਚ ਦਾਖਲ ਹੋ ਰਹੀਆਂ ਹਨ ਜਿਸ ਕਾਰਨ ਵਿਅਕਤੀ ਕਿਸੇ ਨਾ ਕਿਸੇ ਬਿਮਾਰੀ ਤੋਂ ਪੀੜਤ ਹੋ ਰਿਹਾ ਹੈ। ਸਾਹ ਤੇ ਫੇਫੜਿਆਂ ਦੀ ਤਕਲੀਫ ਤੋਂ ਪੀੜਤ ਮਰੀਜ਼ ਇਸ ਮੌਸਮ ‘ਚ ਘਰੋਂ ਘੱਟ ਹੀ ਨਿਕਲਦੇ ਹਨ। ਐਤਵਾਰ ਨੂੰ, AQI ਵੱਧ ਤੋਂ ਵੱਧ 257, ਔਸਤ 209 ਅਤੇ ਘੱਟੋ-ਘੱਟ 148 ਸੀ।
