ਨਵੀਂ ਦਿੱਲੀ- ਅਰਬ ਸਾਗਰ ਵਿੱਚ ਸਮੁੰਦਰੀ ਤੂਫ਼ਾਨ ‘ਬਿਪਰਜੋਏ’ ਦੀ ਦਿਸ਼ਾ ਬਦਲ ਗਈ ਹੈ। ਇਸ ਕਾਰਨ ਗੁਜਰਾਤ ਲਈ ਖ਼ਤਰਾ ਵਧ ਗਿਆ ਹੈ। ਪਹਿਲਾਂ ਬਿਪਰਜੋਏ ਪਾਕਿਸਤਾਨ ਦੇ ਸਮੁੰਦਰੀ ਕੰਢੇ ਵੱਲ ਵਧ ਰਿਹਾ ਸੀ ਪਰ ਮੰਗਲਵਾਰ ਇਹ ਉੱਤਰੀ ਗੁਜਰਾਤ ਦੇ ਕੰਢੇ ਵੱਲ ਵਧਣ ਲਗ ਪਿਆ। ਡਰ ਹੈ ਕਿ ਇਹ ਬੇਹੱਦ ਭਿਆਨਕ ਸਮੁੰਦਰੀ ਤੂਫ਼ਾਨ 15 ਜੂਨ ਨੂੰ ਗੁਜਰਾਤ ਦੇ ਕੰਢੇ ਨਾਲ ਟਕਰਾਏਗਾ। ਦਿਸ਼ਾ ਬਦਲਣ ਦੇ ਨਾਲ-ਨਾਲ ਤੂਫ਼ਾਨ ਦੀ ਰਫ਼ਤਾਰ ਵੀ ਵੱਧ ਗਈ ਹੈ। ਅੰਦਾਜ਼ਾ ਲਾਇਆ ਗਿਆ ਹੈ ਕਿ ਗੁਜਰਾਤ ’ਚ ਇਸ ਦੌਰਾਨ 150 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫ਼ਤਾਰ ਨਾਲ ਹਵਾਵਾਂ ਚੱਲ ਸਕਦੀਆਂ ਹਨ।
ਇਸ ਦੌਰਾਨ ਗੁਜਰਾਤ ਵਿੱਚ ਪ੍ਰਸ਼ਾਸਨ ਨੇ ਹੁਣ ਤੱਕ ਵੱਖ-ਵੱਖ ਸਮੁੰਦਰੀ ਕੰਢਿਆਂ ਵਾਲੇ ਜ਼ਿਲ੍ਹਿਆਂ ਤੋਂ 21,000 ਲੋਕਾਂ ਨੂੰ ਆਰਜ਼ੀ ਕੈਂਪਾਂ ਵਿੱਚ ਤਬਦੀਲ ਕੀਤਾ ਹੈ। ਇਕ ਅਧਿਕਾਰੀ ਨੇ ਮੰਗਲਵਾਰ ਇਹ ਜਾਣਕਾਰੀ ਦਿੱਤੀ। ਸਰਕਾਰ ਦਾ ਟੀਚਾ ਸਮੁੰਦਰੀ ਕੰਢਿਆਂ ਤੋਂ 10 ਕਿਲੋਮੀਟਰ ਦੇ ਘੇਰੇ ’ਚ ਰਹਿਣ ਵਾਲੇ ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ’ਤੇ ਪਹੁੰਚਾਉਣਾ ਹੈ।
ਭਾਰਤ ਦੇ ਮੌਸਮ ਵਿਗਿਆਨ ਵਿਭਾਗ (ਆਈ.ਐੱਮ.ਡੀ.) ਦੇ ਮੁਖੀ ਮ੍ਰਿਤਯੁੰਜਯ ਮਹਾਪਾਤਰਾ ਨੇ ਇੱਕ ਪ੍ਰੈਸ ਕਾਨਫਰੰਸ ਵਿੱਚ ਕਿਹਾ ਕਿ ਇਹ ਸੰਭਾਵਤ ਤੌਰ ’ਤੇ ਬਹੁਤ ਜ਼ਿਆਦਾ ਨੁਕਸਾਨ ਪਹੁੰਚਾ ਸਕਦਾ ਹੈ ਕਿਉਂਕਿ ਨੀਵੇਂ ਖੇਤਰਾਂ ਵਿੱਚ 3 ਤੋਂ 6 ਮੀਟਰ ਉੱਚੀਆਂ ਸਮੁੰਦਰੀ ਲਹਿਰਾਂ ਉੱਠ ਸਕਦੀਆਂ ਹਨ। ਮੁਢਲੇ ਅਨੁਮਾਨ ਮੁਤਾਬਕ ਗੁਜਰਾਤ ਦੇ ਕੱਛ, ਦੇਵਭੂਮੀ ਦਵਾਰਕਾ ਤੇ ਜਾਮਨਗਰ ਜ਼ਿਲ੍ਹਿਆਂ ਵਿੱਚ 15 ਜੂਨ ਨੂੰ 20 ਸੈਂਟੀਮੀਟਰ ਤੋਂ ਵੱਧ ਮੀਂਹ ਪੈ ਸਕਦਾ ਹੈ। ਮਹਾਪਾਤਰਾ ਨੇ ਕਿਹਾ ਕਿ ਆਮ ਤੌਰ ’ਤੇ ਇਨ੍ਹਾਂ ਇਲਾਕਿਆਂ ’ਚ ਇੰਨੀ ਬਾਰਿਸ਼ ਨਹੀਂ ਹੁੰਦੀ , ਇਸ ਲਈ ਨੀਵੇਂ ਇਲਾਕਿਆਂ ਵਿੱਚ ਹੜ੍ਹ ਆਉਣ ਦੀ ਸੰਭਾਵਨਾ ਹੈ।
ਸਮੁੰਦਰੀ ਤੂਫ਼ਾਨ ਨਾਲ ਸਬੰਧਤ ਇੱਕ ਘਟਨਾ ਵਿੱਚ ਇੱਕ ਵਿਅਕਤੀ ਦੀ ਮੌਤ ਹੋ ਗਈ। ਦੇਸ਼ ਦੀ ਜਨਤਕ ਖੇਤਰ ਦੀ ਸਭ ਤੋਂ ਵੱਡੀ ਬੰਦਰਗਾਹ ਕਾਂਡਲਾ ’ਤੇ ਸਮੁੰਦਰੀ ਤੂਫ਼ਾਨ ਦੀ ਚੇਤਾਵਨੀ ਤੋਂ ਬਾਅਦ ਜਹਾਜ਼ਰਾਨੀ ਸਰਗਰਮੀਆਂ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਹੈ। ਕਰਮਚਾਰੀਆਂ ਸਮੇਤ ਲਗਭਗ 3,000 ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ’ਤੇ ਭੇਜਿਆ ਗਿਆ ਹੈ। ਸਾਵਧਾਨੀ ਵਜੋਂ ਪੱਛਮੀ ਰੇਲਵੇ ਨੇ 69 ਟਰੇਨਾਂ ਨੂੰ ਰੱਦ ਕਰ ਦਿੱਤਾ ਹੈ। 32 ਟਰੇਨਾਂ ਨੂੰ ਥੋੜ੍ਹੇ ਸਮੇਂ ਲਈ ਰਦ ਅਤੇ 26 ਟਰੇਨਾਂ ਨੂੰ ਥੋੜ੍ਹੇ ਸਮੇਂ ਲਈ ਰੋਕਿਆ ਗਿਆ ਹੈ।
ਜੈਕਅਪ ਆਇਲ ਰਿਗ ਤੋਂ 50 ਮਜ਼ਦੂਰਾਂ ਨੂੰ ਕੱਢਿਆ ਗਿਆ
ਭਾਰਤੀ ਕੋਸਟਲ ਗਾਰਡਾਂ ਨੇ ‘ਬਿਪਰਜੋਏ’ ਦੀ ਸੰਭਾਵਿਤ ਆਮਦ ਤੋਂ ਪਹਿਲਾਂ ਸਾਵਧਾਨੀ ਵਜੋਂ ਗੁਜਰਾਤ ਵਿੱਚ ਜੈਕਅਪ ਆਇਲ ਰਿਗ ਤੋਂ 50 ਕਰਮਚਾਰੀਆਂ ਨੂੰ ਬਾਹਰ ਕੱਢ ਲਿਆ ਹੈ। ਰੱਖਿਆ ਮੰਤਰਾਲਾ ਵੱਲੋਂ ਜਾਰੀ ਇੱਕ ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਇੱਕ ਤੇਜ਼ ਅਤੇ ਚੰਗੀ ਤਰ੍ਹਾਂ ਤਾਲਮੇਲ ਵਾਲੇ ਆਪ੍ਰੇਸ਼ਨ ਵਿੱਚ ਭਾਰਤੀ ਕੋਸਟਲ ਗਾਰਡਾਂ ਨੇ ਸਾਵਧਾਨੀ ਵਜੋਂ 13 ਜੂਨ ਨੂੰ ਗੁਜਰਾਤ ਦੇ ਓਖਾ ਤੋਂ 50 ਲੋਕਾਂ ਨੂੰ ਸੁਰੱਖਿਅਤ ਬਾਹਰ ਕੱਢਿਆ ਹੈ।
ਉਧਰ ਮੌਸਮ ਦੀ ਗੱਲ ਕਰੀਏ ਤਾਂ ਪੰਜਾਬ ‘ਚ ਅਗਲੇ 4 ਦਿਨਾਂ ਤੱਕ ਮੀਂਹ ਪੈਣ ਨਾਲ ਮੌਸਮ ਸੁਹਾਵਣਾ ਹੋਣ ਦੀ ਭਵਿੱਖਬਾਣੀ ਹੈ ਤੇ ਲੋਕਾਂ ਨੂੰ ਵੱਟ ਕੱਢਦੀ ਗਰਮੀ ਤੋਂ ਰਾਹਤ ਮਿਲਣ ਦੀ ਸੰਭਾਵਨਾ ਹੈ। ਚੱਕਰਵਾਤ ਦੇ ਕਮਜ਼ੋਰ ਪੈਣ ‘ਤੇ ਸਰਕੂਲੇਸ਼ਨ ਆਲੇ-ਦੁਆਲੇ ਘੁੰਮਦੀਆਂ ਹਵਾਵਾਂ ਪੁਰੇ ਦੇ ਰੂਪ ‘ਚ ਪੰਜਾਬ ਵੱਲ ਆ ਸਕਦੀਆਂ ਹਨ ਜਿਸ ਨਾਲ 17-18 ਜੂਨ ਪੰਜਾਬ ‘ਚ ਮੀਂਹ ਪੈਣ ਦੇ ਆਸਾਰ ਬਣ ਸਕਦੇ ਹਨ। ਭਾਵੇਂ ਇਹ ਚੱਕਰਵਾਤੀ ਤੂਫ਼ਾਨ ਸਿੱਧੇ ਤੌਰ ‘ਤੇ ਪੰਜਾਬ ਨਾ ਪਹੁੰਚੇ ਪਰ ਇਸ ਦੁਆਰਾ ਧੱਕੀਆਂ ਅਰਬ ਦੀਆਂ ਹਵਾਵਾਂ ਪੱਛਮੀ ਜੈਟ ਨਾਲ ਟਕਰਾਅ ਕੇ ਪੰਜਾਬ ‘ਚ ਮੀਂਹ ਦਾ ਮਾਹੌਲ ਸਿਰਜ ਸਕਦੀਆਂ ਹਨ।
