ਨਵੀਂ ਦਿੱਲੀ : ਤਿਰੂਵਨੰਤਪੁਰਮ ਦੇ ਵਾਮਨਪੁਰਮ ਵਿੱਚ ਮੁੱਖ ਮੰਤਰੀ ਪਿਨਾਰਈ ਵਿਜਯਨ ਦਾ ਕਾਫਲਾ ਹਾਦਸਾ ਦਾ ਸ਼ਿਕਾਰ ਹੋ ਗਿਆ। ਕੇਰਲ ਦੇ ਮੁੱਖ ਮੰਤਰੀ ਵਿਜਯਨ ਦੀ ਸਰਕਾਰੀ ਕਾਰ ਸਮੇਤ ਸੋਮਵਾਰ ਸ਼ਾਮ ਨੂੰ ਹੋਏ ਹਾਦਸੇ ਵਿੱਚ ਪੰਜ ਵਾਹਨ ਆਪਸ ਵਿੱਚ ਟਕਰਾ ਗਏ। ਉਸ ਦੀ ਕਾਰ ਦਾ ਜ਼ਿਆਦਾ ਨੁਕਸਾਨ ਨਹੀਂ ਹੋਇਆ, ਜਦਕਿ ਸਾਰੇ ਵਾਹਨਾਂ ਦਾ ਭਾਰੀ ਨੁਕਸਾਨ ਹੋਇਆ ਹੈ।
ਮੁੱਖ ਮੰਤਰੀ ਵਿਜਯਨ ਕੋਟਾਯਮ ਤੋਂ ਤਿਰੂਵਨੰਤਪੁਰਮ ਪਰਤ ਰਹੇ ਸਨ। ਇਹ ਹਾਦਸਾ ਵਾਮਨਪੁਰਮ ਪਾਰਕ ਜੰਕਸ਼ਨ ‘ਤੇ ਸ਼ਾਮ ਕਰੀਬ 5.45 ਵਜੇ ਵਾਪਰਿਆ। ਮੁੱਖ ਮੰਤਰੀ ਦੇ ਸੁਰੱਖਿਆ ਕਾਫ਼ਲੇ ਨਾਲ ਇਹ ਹਾਦਸਾ ਉਸ ਸਮੇਂ ਵਾਪਰਿਆ ਜਦੋਂ ਇੱਕ ਸਕੂਟਰ ਚਾਲਕ ਮੁੱਖ ਮੰਤਰੀ ਦੀ ਗੱਡੀ ਦੇ ਅੱਗੇ ਜਾ ਕੇ ਐਮਸੀ ਰੋਡ ਤੋਂ ਅਟਿੰਗਲ ਵੱਲ ਮੁੜ ਰਿਹਾ ਸੀ।
ਡਰਾਈਵਰ ਨੂੰ ਅਚਾਨਕ ਲਗਾਉਣੀ ਪਈ ਬ੍ਰੇਕ
ਮੁੱਖ ਮੰਤਰੀ ਦੇ ਕਾਫ਼ਲੇ ਦੇ ਵਾਹਨ ਦੇ ਡਰਾਈਵਰ ਨੂੰ ਅਚਾਨਕ ਬ੍ਰੇਕ ਲਗਾਉਣੀ ਪਈ, ਜਿਸ ਕਾਰਨ ਮੁੱਖ ਮੰਤਰੀ ਦੀ ਸਰਕਾਰੀ ਕਾਰ, ਇੱਕ ਐਸਕਾਰਟ ਵਾਹਨ, ਵਟਾਪਾਰਾ ਅਤੇ ਕਾਂਜੀਰਾਮਕੁਲਮ ਪੁਲਿਸ ਯੂਨਿਟਾਂ ਦੀਆਂ ਗੱਡੀਆਂ ਅਤੇ ਐਂਬੂਲੈਂਸ ਇੱਕ ਦੂਜੇ ਨਾਲ ਟਕਰਾ ਗਈਆਂ। ਇਸ ਘਟਨਾ ਤੋਂ ਬਾਅਦ ਸੁਰੱਖਿਆ ਅਧਿਕਾਰੀਆਂ ਨੇ ਤੁਰੰਤ ਮੁੱਖ ਮੰਤਰੀ ਨੂੰ ਸੁਰੱਖਿਆ ਦਿੱਤੀ। ਕਈ ਮੈਡੀਕਲ ਸਟਾਫ ਮੁੱਖ ਮੰਤਰੀ ਦੀ ਗੱਡੀ ਵੱਲ ਭੱਜਦਾ ਦੇਖਿਆ ਗਿਆ।
ਹਾਦਸੇ ‘ਚ ਕੋਈ ਜ਼ਖਮੀ ਨਹੀਂ ਹੋਇਆ
ਸਥਾਨਕ ਮੀਡੀਆ ਰਿਪੋਰਟਾਂ ਦੇ ਅਨੁਸਾਰ, ਪੁਲਿਸ ਨੇ ਕਿਹਾ ਕਿ ਹਾਦਸੇ ਵਿੱਚ ਕੋਈ ਜ਼ਖਮੀ ਨਹੀਂ ਹੋਇਆ ਅਤੇ ਮੁੱਖ ਮੰਤਰੀ ਨੇ ਤਿਰੂਵਨੰਤਪੁਰਮ ਦਾ ਆਪਣਾ ਦੌਰਾ ਮੁੜ ਸ਼ੁਰੂ ਕੀਤਾ। ਪੁਲਿਸ ਨੇ ਦੱਸਿਆ ਕਿ ਘਟਨਾ ਸਬੰਧੀ ਕੋਈ ਮਾਮਲਾ ਦਰਜ ਨਹੀਂ ਕੀਤਾ ਗਿਆ ਹੈ।
