ਜਲੰਧਰ : ਚਹੇੜੂ ਸਟੇਸ਼ਨ ‘ਤੇ ਇੰਟਰਲਾਕਿੰਗ ਦੇ ਕੰਮ ਕਾਰਨ ਰੇਲਵੇ ਵੱਲੋਂ 12 ਦਿਨਾਂ ਦਾ ਬਲਾਕ ਲਿਆ ਹੋਇਆ ਸੀ। ਇਸ ਕਾਰਨ ਬੁੱਧਵਾਰ ਨੂੰ ਵੀ ਸ਼ਤਾਬਦੀ ਐਕਸਪ੍ਰੈਸ ਫਗਵਾੜਾ ਪਹੁੰਚੀ ਅਤੇ ਸ਼ਾਨ-ਏ-ਪੰਜਾਬ ਐਕਸਪ੍ਰੈਸ ਲੁਧਿਆਣਾ ਹੀ ਪਹੁੰਚੀ।
ਅਜਿਹੇ ‘ਚ ਦੁਪਹਿਰ 2 ਵਜੇ ਤੱਕ ਅੰਮ੍ਰਿਤਸਰ ਲਈ ਸਿਟੀ ਰੇਲਵੇ ਸਟੇਸ਼ਨ ਤੋਂ ਕੋਈ ਟਰੇਨ ਨਾ ਆਉਣ ਕਾਰਨ ਯਾਤਰੀਆਂ ਨੂੰ ਪ੍ਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਸੀ। ਕਿਉਂਕਿ ਰੇਲਵੇ ਵੱਲੋਂ 58 ਟਰੇਨਾਂ ਰੱਦ ਕਰ ਦਿੱਤੀਆਂ ਗਈਆਂ ਹਨ ਅਤੇ ਜੋ ਚੱਲ ਰਹੀਆਂ ਹਨ, ਉਹ ਡਾਇਵਰਟ ਕੀਤੇ ਰੂਟਾਂ ‘ਤੇ ਹੋਣ ਕਾਰਨ ਦੇਰੀ ਨਾਲ ਪਹੁੰਚ ਰਹੀਆਂ ਹਨ। ਇਸ ਕਾਰਨ ਯਾਤਰੀਆਂ ਦੀਆਂ ਮੁਸ਼ਕਲਾਂ ਅਤੇ ਪ੍ਰੇਸ਼ਾਨੀਆਂ ਵੀ ਵਧ ਗਈਆਂ ਹਨ।
ਅੱਜ ਤੋਂ ਸਾਰੀਆਂ ਟਰੇਨਾਂ ਚੱਲਣੀਆਂ ਸ਼ੁਰੂ
ਸਵਾਰੀਆਂ ਨੂੰ ਬੱਸ ਸਟੈਂਡ ਤੋਂ ਬੱਸਾਂ ਰਾਹੀਂ ਅੱਗੇ ਜਾਣ ਲਈ ਮਜਬੂਰ ਹੋਣਾ ਪਿਆ। ਟਰੇਨਾਂ ਨੂੰ ਰੱਦ ਕਰਨ ਅਤੇ ਡਾਇਵਰਟ ਕੀਤੇ ਰੂਟਾਂ ‘ਤੇ ਚੱਲਣ ਨੂੰ ਲੈ ਕੇ 27 ਨਵੰਬਰ ਤੱਕ ਬਲਾਕ ਰੱਖਿਆ ਗਿਆ ਸੀ। ਇਸ ਕਾਰਨ ਵੀਰਵਾਰ ਨੂੰ ਸਾਰੀਆਂ ਟਰੇਨਾਂ ਫਿਰ ਤੋਂ ਆਪਣੇ ਰੂਟਾਂ ‘ਤੇ ਚੱਲਣੀਆਂ ਸ਼ੁਰੂ ਹੋ ਗਈਆਂ ਹਨ। ਇਸ ਦੇ ਨਾਲ ਹੀ ਯਾਤਰੀਆਂ ਨੂੰ ਵੀ ਕੁਝ ਰਾਹਤ ਮਿਲੇਗੀ।
ਸ਼ਤਾਬਦੀ ਸਮੇਤ 58 ਟਰੇਨਾਂ ਬਹਾਲ
12 ਦਿਨਾਂ ਬਾਅਦ ਜਲੰਧਰ ਸਿਟੀ ਰੇਲਵੇ ਸਟੇਸ਼ਨ ‘ਤੇ ਸ਼ਤਾਬਦੀ ਐਕਸਪ੍ਰੈਸ, ਸ਼ਾਨ-ਏ-ਪੰਜਾਬ ਸਮੇਤ 58 ਰੱਦ ਕੀਤੀਆਂ ਟਰੇਨਾਂ ਨੂੰ ਬਹਾਲ ਕਰ ਦਿੱਤਾ ਗਿਆ ਹੈ। ਜਿਸ ਕਾਰਨ ਯਾਤਰੀਆਂ ਨੂੰ ਵੀ ਕੁਝ ਹੱਦ ਤੱਕ ਰਾਹਤ ਮਿਲੀ। ਹਾਲਾਂਕਿ ਸ਼ਤਾਬਦੀ ਐਕਸਪ੍ਰੈਸ ਆਪਣੇ ਨਿਰਧਾਰਿਤ ਸਮੇਂ ਤੋਂ ਅੱਧਾ ਘੰਟਾ ਦੇਰੀ ਨਾਲ ਪਹੁੰਚੀ।
ਇਸ ਤੋਂ ਇਲਾਵਾ ਨੰਗਲ ਡੈਮ ਐਕਸਪ੍ਰੈਸ 14506, ਆਮਰਪਾਲੀ ਐਕਸਪ੍ਰੈਸ 15707, ਲੁਧਿਆਣਾ ਛੇਹਰਟਾ ਮੇਮੂ 04591, ਹਾਵੜਾ ਐਕਸਪ੍ਰੈਸ 13005 ਇੱਕ ਘੰਟਾ ਦੇਰੀ ਨਾਲ ਪਹੁੰਚੀਆਂ।
